Saturday, March 22, 2008

كتابه حره

من عادتي ما اكتب الا بموضوع محدد اعتقد انتوا ملاحظين هذا الشي بس المشكله صار مده مداترهم اصوغ موضوع محدد اكيد تحبون تعرفون السبب ؟؟ الجواب اسهل منه ماكو اصلا مو كد ما هو سهل صاير جواب كلاسيكي ( مشغول) طبعا ما كو واحد مشغول طوال الوكت بس ماكو اولويه للأمور وطبعا نقصان النتظيم للوقت في احيان كثيره سبب في تضييع الوقت .اني اليوم ضايج وما ادري شسوي واريد اكتب اي شي فلكيت افضل حل اكتب بوست جديد بس حرت شسمي البوست وعن شنو موضوعه لهذا كلت خلي اقلد بعض الاصدقاء من اصحاب البلوكات في نهج اسلوب الكتابه الحره واقصد بالكتابه الحره هو ان اكتب بدون ما افكر مسبقا بموضوع للكتابه ويمكن هذه اول مره اجرب هذه النوع من الكتابه ,بس لو انضر للموضوع من ناحيه الايجابيات والسلبيات راح اشوف ان الاسترسال في الكتابه واعتقد الكتابه بدون قيود يمكن اهم ايجابيات الموضوع وطبعا بدون ما انسى ان للكتابه دور مهم في الراحه النفسيه طبعا هذا الشي بالنسبه الي ما اعرف اذا الاخرين هم يشعرون نفس الشعور على العموم لو نجي بالمقابل الى السلبيات اعتقد انه اول النقاط هي التكلم بلا هدف واضح ,نوع من الهذيان على طاري الهذيان اتذكرت فد قصه قصيره او ما شابه تتكلم عن محاوره بين طبيب امراض نفسيه وشخص ما اذكر شنو ماهيته المهم الحديث الي بينهم يدور عن امرأه مصابه بالجنون فالشخص يكول للدكتور ماكو علاج لهذه المرأه المسكينه الدتكور يرد عليه يكوله حتى لو اكو علاج اني ما اريد اعالجهه فالشخص يتعجب ويسأل الطبيب عن السبب فالطبيب يجاوب يكول انته ما تعرف هذه الانسانه المجنونه شكد سعيده الان ذلك ان المجنون لا يفكر بالحياة وان كل شي لديه مستباح فلا يحمل في باله اي هم لأي شأن من شؤون الحياة بالتالي اني حسب سلبيات الموضوع دا اهذي هههههههههههه راح اصير مجنون تخيلوا ههههههه !!! لالا خلي ارجع شويه قبل الجنون خل اسولفلكم عل الكليه وعن الكورس الثاني شويه شوفوا يا اصحاب الحياة بديت الكورس الثاني من الدراسه بوهس على الدراسه ما اعرف عجب ههههههه يمكن بسبب الضروف الاخيره من وجوب التزام الدوام ويمكن رفض للواقع السابق ومحاوله جاده في تصحيح مسار او ما شاكل ذلك على كل حال بدا الكورس الثاني وبدا القلق النفسي ينتابني من جديد تعرفون من شنو ؟؟ اخاف اخلص كليه ويجيني احد يسألني عن نقطه معينه بمجالي واما اعرف اجاوب حيل اخاف من هذه الحاله,يذكره بالخير دكتور عاشور درسني بأحد الكليات العراقيه وبأحد المحاضرات كال ابنائي اريدكم تعرفون كلشي بمجال اختصاصكم فأسألوا هسه دام انتوا بعدكم طلبه ومن حقكم السؤال لأن من تتخرجون يجي الدور عليكم انتوا الي تنسألون لهذا بالمحاضره الاحظ اني من اكثر الطلبه الي يسألون الاستاذ واحاول استفسر عن اي شي ممفهون بالنسبه الي حتى مرات اكول خاف الاستاذ يضوج بس ابرر بالمقابل اكول لعد هو شنو شغله غير حتى احنه نفتهم الي يكوله ,دا احسب مبقى شي للكليه منا شهرين وتنتهي هاي السنه وباقي بس سنه الجايه وتخلص وراها راح ندخل مرحله جديده بالحياة ويراودني شعور ان ساعتها راح اواجه الحياة وهي فاتحه بواباتها على اقصاها

10 comments:

Sandybelle said...

خوش حجي..اتمنالك الموفقيه
سمعت الوضع مو زين ابغداد
انشالله السلامه دائما

Yoda said...

كلامك حلو وصدكني طريقة الكتابة الحرة طريقة حلوة وجميلة واحلى شي بيهة هو ان الكتابة تظهر شخصيتك (اذا ردت انتة تظهرها) المهم....
تقريبا نفس القصة مال الكلية الي تكلمت حضرتك عنها صارت وياية والاستاذ كال كلمات مشابهةوان شاء الله رح اكتب بوست عنها لان سويتلي واهس على الكتابة بعد ان خلص شحن الباتري مال البوستات عندي... ان شاء الله باقرب وقت اكتبه...
تحية مني الك وصدك اصدقائك من اصحاب المدونات ينتظرون كتاباتك ...

اخوك
يودا

jisoo said...

هلوووو ساندي
تسلمين عل المرور اللطيف. شكرا عل السؤال ,الوضع ببغداد مو تمام بس الحمد لله والشكر لازلنا صامدين ههههه

jisoo said...

مرحبا يودا
كيف الحال اخي العزيز تسلملي على الرد. صراحه تعجبني الردود الي بيها مناقشه للموضوع لأن احس انها مو مجرد تعليق للمجامله .تحياتي الك ودمت سالما
اخوك جيسو

Michomeme said...

هلو اخوية جيسو شلونك؟ ان شاء الله تكون بخير ..
طبعا ذكرتني بأيام الكلية، شلون جانت ايام حلوة كلها بمحاظراتها وامتحاناتها والاساتذة والقراية، والله جان اروع شي عندي من ظمن الونسة وية صديقاتي انو اكعد بالمحاظرة وانتبه على الاستاذ وادون الملاحظات المهمة، شكد جان شي حلو لمن استمع لاستاذة تاريخ الادب الفرنسي الله يذكرها بالخير وهي تتكلم النا عن مواضيع فلسفية، حب، اخلاق، اهداف، اي نوع فلسفة يرتبط بحياتنا، تعلمت منها هواية اشياء لحد هسة هي ببالي.
استغل هاي الفترة، لان مهما تكون انت تعبان من الدراسة بس بعد التخرج راح تعرف انو ماكو احلى منها وتتمنى لو يوم واحد يرجع حتى تكعد بالقاعة وتستمع لمحاظرة حلوة..

بالتوفيق ان شاءالله
والله يحفظ الجميع يارب


اختك ميشو

jisoo said...

مرحبا اخت ميشو
نور البلوك بتعليقج وكلامج ذهب ,مبين ان الكليه احلى فترات الشباب لأن اخر مراحل الدراسه بس يبقى كلشي بوكته حلو .

اخوج جيسو

jisoo said...
This comment has been removed by the author.
Sandybelle said...

السلام عليكم..
اعتقد مو لازم انو احنه دائما انذكر صاحب البلوك بلكتابه, رجاء بوست, لان اني احب اقره للعراقيين هوايه, و مليت من الانتظار, رجاء صيروا كرماء و حنوا.. اني بانتظالر بوست جديد
جديد..
لما هو جديد
ساندي بل

sad princes said...

فعلا اني هم عندي نفس المشكلة بالكتابه ما اعرف اش اكتب او منين ابدي
اعتقد البوست الحر هو موضوع جيد

*الخاتــــIraqi Ladyـــووون* said...

هههههه ما أدري على شنو أعلق، هاي مو بس كتابة حره، هاي كتابة تدوخ و آني أساساً دايخة و الشقيقة كاعد تشتغل وياي خوش شغل..

عموماً، شد حيلك بالدراسة و موفق ان شاء الله

تقبل تحياتي