استهزاء بالاحاسيس

مساء الخير
اول شغله احب اكولهه عن طبيعة كتابتي هم مرات يعجبني احجي فصحى من احس ان الموضوع نوعا ما رسمي ومرات احجي باللهجه العراقيه عندما الموضوع يكون غير رسمي على الاقل بالنسبه الي من احسه غير رسمي.
هسه ساعه 11 بالليل واليوم هو الثلاثاء المصادف 6-3-2007 جنت كاعد اسولف ويه ولد صديقي العام جان تربطه ببنيه بالكليه مالتنا علاقه نكدر نكول عنها كبل لأن اني بنضري صرت اشوف اكو علاقات ما اكدر اسميهه علاقات غراميه ولا علاقات حب ولا بنفس الوقت علاقات عابره مدتهه كم يوم او اسبوع فهذي العلاقات طويله المدى ضعيفه التأصر سميتها couple بدون تحديد .المهم البنيه العام سحبت نفسها وانهت العلاقه والولد هم احترم نفسه وانسحب وتركهه بس هسه البنيه دتحاول ترجع للولد يوم تخابره يوم تمسجله ومن هالسوالف المهم الولد يريد يروح يكول للبنيه انتي الي نهيتي كلشي ويخصم الموضوع وبحزم. وديسألني شنو رأيي بالموضوع اني كلتله لو اني بمكانك فما كنت راح افضل هذا الاسلوب انما افضل تروح تتفاهم وياها وتكوللهه انه احنه في وقت من الاوقات كانت افكارنا متقاربه الى حد ما اما الآن فوجهات النضر بيناتنه مختلفه الى حد كبير وانه احنا مو اول اثنين نفترق عن بعض. خاصه ان الولد صديقي ميفكر يرجع للبنيه نهائيا.

بس اني هسه عندي سؤال: اريد كل شخص يفكر يكتب تعليق عل الموضوع يتخيل نفسه انه هو على علاقه ببنيه او العكس اقصد بنيه تتخيل نفسهه تكون على علاقه بولد ويجي الشخص المقابل يكول نه كلشي بيناتنه انتى او بعباره اكثر صراحه "انته مثل اخويه " او "انتي مثل اختي" تتوقعون شنو راح تكون ردة فعل هالشخص وشنو مقدار هالالم ... لا والموضوع الاكثر كارثيه ان الشخص الي كال انت مثل اختي وانهى كلشي وره مده يرجع ويكول اني غلطان او يحاول يعيد العلاقه شنو راح يكون ردة الفعل بالمقابل تتوقعون اللعب والاستهزاء بالاحاسيس شي سهل ؟؟؟؟

ارجو التعليق بكل صدق واحساس او عدم التعليق اذا كان التعليق خالي من المشاعر




jisoo