Monday, January 28, 2008

فتره حرجه

مساء الورد
كيف الحال يلمتابعين حقكم والله من تعتبون عليه لأن مقصر بحقكم وبحق البلوك واعرف البلوك مهمته التدوين المستمر لكن شكول للضرف ومو بس الضرف لا والحاله النفسيه الها تأثير كبير بالموضوع , خل نتكلم بصراحه ونكون واقعيين واحدنه يكعد يفكر بأداء واجباته تجاه الوطن والمجتمع والاسره وتجاه نفسه لو يكعد يكتب بوست بالبلوك ؟؟ مراح اكولكم اني كاضي حياتي بأداء واجباتي بس من افكر بالبلوك اكول اكو اشياء كثيره اهم من كتابه موضوع جديد . اليوم جان اخر يوم اداوم بيه بالنصف الاول من السنه الدراسيه , ايباااه والله الايام شلون تمشي بسرعه وبدون ما نحس بيها ,ذاك اليوم بدا الدوام شبسرعه وصلنه نص السنه , قبل من جانوا اهلنه يكولون مثلا الاحتلال البرطاني ضل بالعراق حوالي ست سنوات مجنت اتخيل المده اكول حييييل ست سنوات شلون كدروا يعيشون الناس بهالست سنوات تالي هسه احنه صارلنه خمس سنوات وصار عدنه الموضوع طبيعي او مو طبيعي بس كدرنا نتعايش ويه الموضوع رغم صعوبته , هسه خلينا من هالسالفه خل نرجع لموضوع الزمن مال هالوكت وخل اسولفلكم شويه على هالفتره, والله هذه الفتره اعتقد لو اريد احجي عن احداثها ما اكدر اختصرها بكلمات معدوده من دون ما افصلها الى فترات زمنيه, اول فتره هي الي اثرت بيه كلش ولي هسه اعيش تأثيرها واعتقد راح يبقى تأثيرها لفتره طويله بالمستقبل القريب جانت فترة تحديد ثوابت وعانيت خلال هذه الفتره من مشاكل عده وطبعا بعض هذه المشاكل انحلت والحمد لله والبعض الاخر ضل مرتبط بيه لحد هذه الايام بس ممهتم لهذه المشاكل لأن معتبرهه مشاكل طبيعيه واعتقد ان من شروط الحياة الناجحه هي مواجهة مشاكل يوميه بكافة مجالات الحياة ومحاوله ايجاد الحلول الها مهما كانت عصيبه ولا مانع من الفشل ببعض المشاكل بس شرط تحويل الفشل الى نجاحات مستقبليه اول مشكله واعتقد اصغر مشكله رغم خطورتها هو اصدار فصل بحقي بسبب غياباتي المتكرره بالكليه وطبعا رغم ما اني اتفلسلف واحاول احل مشاكل المجتمع اكو مشاكل خاصه بيه ما احلها من ارجع لموضوع الغياب ابرر لنفسي الامر لأن اني عندي المحاضرات مال السنه كامله يعني اعرف الاستاذ شراح ينطيني بالامتحان وشنو نمط الاسئله وشنو الماده واذا على موضوع الشرح فالاستاذ ميشرح لأن هذا واجبي مو واجب الاستاذ ।انتوا خلوا نفسكم مكاني راح تدخلون محاضره بزمن العراق مليان فوضى ودمار وخطط تهديم البنى التحتيه وشباب مهدور وعمر يمشي بينا ومشايفين منه شي وهو اول وتالي اني ناجح بالمواد , ما اريد ادوخكم بسوالفي لأن الحجي ميخلص بس كملخص عن الموضوع اني حبيت اسولف وياكم شويه وانبأكم بأخباري ولو بشكل جدا موجز بس اوعدكم ان احجيلكم تفاصيل بالفتره المقبله ان شاء الله ولو الفتره المقبله ممرتاحلهه حيل بس ان شاء الله الي ببالي يصير انتوا هم ادعوا

3 comments:

Anonymous said...

حمودي صدك جذب ادعيلك كبد
وشسويت عالغياب صدك عبرولكياهة لو لا
ولو مكايلي عالابالك ما اعرف يمكن كايم تضم عليه

braveking said...

صدك كبد نسيت اكلك اني منو
بريف كنك

jisoo said...

لا حجي بريف على بختك اني اضم عليك هيجي شي ليش قابل مو ابن كليتي لو انته من اليتشمتون ؟؟ بس غير انته ملتهي بدنياك وما اريد اشغل تفكيرك بهذا الموضوع .
يسلملي مرورك يا ورد